رفاہ انٹرنیشنل یونیورسٹی کے وائس چانسلر ڈاکٹر انیس احمد نے کہا ہے کہ نبی اکرمؐ کی سیرت زندگی کے ہر میدان تعلیم، سیاست، میڈیا، صحت، بین المذاہب تعلقات، معیشت اور سماجی ترقی کے لیے نہ صرف رہنمائی فراہم کرتی ہے بلکہ ایک روشن اور متوازن راستہ بھی پیش کرتی ہے عصرِ حاضر کے پیچیدہ مسائل اور چیلنجز کا حقیقی اور پائیدار حل صرف تعلیماتِ نبوی ؐ میں پوشیدہ ہے اگر ہم اخلاقی، سماجی اور معاشی مشکلات کا دیرپا حل چاہتے ہیں تو ہمیں سیرتِ رسول ؐ کو اپنی انفرادی اور اجتماعی زندگی کا عملی رہنما بنانا ہوگا۔ سیرتِ نبوی ؐ ماضی، حال اور مستقبل تینوں ادوار کے لیے انسانیت کی ابدی اور جامع رہنمائی کا سرچشمہ ہے ان خیالات کا اظہار انہوں نے رفاہ انٹرنیشنل یونیورسٹی کے زیرِ اہتمام ایک روزہ سیرتِ طیبہ ؐ پر منعقد نمائشِ کتب کی تقریب سے خطاب کرتے ہوئے کیا۔
